لبنان الفكرة... أرزو مش من خشب
ب البداية كانت الفكرة والفكرة كانت مع الله...ب الفكرة كانت الحياة والحياة كانت نور الانسان... والنور بيشعّ ب العتمة والعتمة ما بتفهمو! - مار يوحنّا لأنّو لبنان اللي بحملو ب قلبي أكبر من لبنان الواقع... لأنّو لبنان اللي بحملو ب عيوني أحلا من لبنان اليوم... لأنّو لبنان اللي استوطن فيي أعظم من لبنان اللي بتسكنوه... حبّيت عرّفكن ع لبناني: لبنان-الفكرة اللي أرزو مش من خشب! كل شي بيبتدي ك فكرة. والفكرة إلهام من الله. هو اللي بيعطينا ياها. الفكرة أساس الحلم والأمل. والأمل حياة الإنسان. من دونو ما في طموح و لا تطوّر و لا سعادة. ومن دون السعادة ما في حياة... ت الأمل ب لبنان المستقبل ينتشر، الأمل ب لبنان اللي مش بس بيواكب الحضارة العالمية لا بل بيتقدمها، لازم تنتشر الفكرة. لازم الناس تعرف فيها، ولازم تفهمها... صحيح إنّو العالم صعب يفهم النور (بعد ل اليوم ما فهم تعاليم الديانات السماويّة) لكن ع القليلة بيعرف إنّو في أمل لأنّو في نور. وبيعرف الطريق اللي لازم يتبعو لأنّو بيعرف اتّجاه النور.
